අධ්‍යාපනය විකිණීමට එරෙහිව ජනතාව දැනුවත් කිරීම් සිදු කල විශ්වවිද්‍යාල සිසු සිසුවියන් 10 දෙනෙකු අත්අඩංගුවට



අන්තර් විශ්වවිද්‍යාලයීය  ශිෂ්‍ය බලමණ්ඩලය හා වෛද්‍ය පීඨ ශිෂ්‍ය ක්‍රියාකාරී කමිටුව නියෝජනය කරමින් ගලගමුව ප්‍රදේශයේ දැනුවත් කිරීම් සිදු කරමින් සිටි විශ්වවිද්‍යාල සිසුවියක් සහ සිසුන්  නව දෙනෙකු ගල්ගමුව පොලිසිය මඟින් අත්අඩංගුවට ගෙන ඇත.
අද(08) උදෑසන ගල්ගමුව ප්‍රදේශයේ දැනුවත් කිරීම් වල නිරත ව සිටියදී ගල්ගමුව පොලිසියේ නිලධාරීන් පැමිණ තොරතුරු ලබා ගැනීමට අවශ්‍ය බව පවසා ඇත. ඒ අනුව අදාළ ප්‍රදේශයේ සහෝදරයෙකු තොරතුරු ලබා දීමෙන් අනතුරුවත් පොලිසිය දිගින් දිගටම සියලු දෙනාගේ තොරතුරු ඉල්ලා තර්ජනය කර ඇත්තේ තොරතුරු ලබා නොදෙන්නේ නම් අත්අඩංගුවට ගන්නා බවයි. ඉන් අනතුරුව ගල්ගමුව ප්‍රදේශයේ එම සිසු සිසුවියන් නවාතැන්  ගෙන සිටි නිවෙසට ගොස් එහි සිටි සහෝදරියක් හා සහෝදරවරු නව දෙනෙක් අත්අඩංගුවට ගෙන ඇත.
අධ්‍යාපනය විකිණීමට එරෙහිව පසුගිය මස 30 වනදා සිට මෙම දැනුවත් කිරීමේ වැඩසටහන දිවයිනේ දිස්ත්‍රික්ක 17 ක ගම්මාන ඉලක්ක  කරගනිමින් සිදු කරනුයේ විශ්වවිද්‍යාලවල සිසු සිසුවියන්  විසිනි. මෙම දැනුවත් කිරීම් වල ප්‍රතිපලයක් ලෙස අද(08) දවස වන විට අධ්‍යාපනය විකිණීමට එරෙහිව ජනතා උද්ඝෝෂණ  22ක් සිදු කර ඇත. මෙම උද්ඝෝෂණ අතරතුර විශේෂයෙන් බිබිල,බදුල්ල,අම්පාර,කුරුණෑගල,පොළොන්නරුව ප්‍රදේශවලදී පොලිසිය නිවෙස් වලට ගොස් උද්ඝෝෂණ සඳහා සහභාගී නොවන ලෙස තර්ජනය කිරීම් සිදු කර ඇත. එසේම රාජ්‍ය බුද්ධි අංශ වල පිරිස් එම ගම්  ප්‍රදේශ වලට ගොස් සහෝදර සහෝදරියන් පිලිබඳ අසත්‍ය තොරතුරු ප්‍රකාශ කරමින් තර්ජනය කිරීමේ ව්‍යාපෘතියක්ද ක්‍රියාත්මක කෙරිණ.
ගල්ගමුවේදී අත්අඩංගුවට ගත සහෝදර සහෝදරියන්ගෙන් තොරතුරු ඉල්ලා සිටින්නේ අන් කිසිවකට නොව නිවෙස් වලට ගොස් තර්ජනය කිරීම් සිදු කිරීමට හා අභූත චෝදනා එල්ල කරමින් නිරන්තර පොලිසි වලට කැඳවීම් කිරීම් සඳහායි.
අධ්‍යාපනය විකිණීමට එරෙහි වීම අද අවන විට මෙරට පාලකයන්ට අනුව අපරාධයක් බවට පත් කොට ඇති අතර මෙවැනි ක්‍රියා හරහා එය තවදුරටත් තහවුරු වේ. මෙය පොලිසිය හිතුමතේ සිදු කල අත්අඩංගුවට ගැනීමක් නොව ආණ්ඩුවේ අණට කීකරු වී සිදු කල අත්අඩංගුවට ගැනීමකි. ඒ අනුව මෙම අත්අඩංගුවට ගැනීම තරයේ හෙලා දකින අතර ඊට එරෙහි ක්‍රියාමාර්ග ගැනීමටද අප සුදානමින් සිටින්නෙමු.


අනෙක් අයටත් බලන්න ශෙයා කරන්න >>>