පාසල් තුළ සිදු කරන මුදල් අයකිරීම වහා නවතනු!

 නිදහස් අධ්‍යාපනය රකිනවා කියලා, දරුවන්ට සුභ අනාගතයක් හදනවා කියලා පාරම්බාපු මේ රටේ පාලකයෝ අධ්‍යාපනයට කරමින් ඉන්නේ මොකක්ද කියලා අපි කවුරුත් දැන් දන්නවා. දවසින් දවස අධ්‍යාපනයට වෙන් කරන ප‍්‍රතිපාදන කප්පාදු  කරමින්, ආප්ප කඩ වගේ හැම තැනම උපාධි කඩ අරබමින්, සරසවි සිසුන් බුරුතු පිටින් සරසවි වලින් දොට්ට ඇදල දමමින්, පාසල් දවස ගානේ වසා දමමින් සිදු කරමින් ඉන්නේ අන්න ඒ වැඩපිළිවෙල බව අපි හැමෝම දන්නවා. 
නව ලිබරල් ධනවාදී ප‍්‍රතිසංස්කරණ ලංකාවේ ක‍්‍රියාත්මක කරන්න පටන් ගත්ත දවසේ ඉදලා මේ රටේ හැම පාලකයෙකුටම අධ්‍යාපනය සම්බන්දයෙන් තිබුනේ එක ප‍්‍රතිපත්තියයි. ඒ අධ්‍යාපනය වෙළද භාණ්ඩයක් කරන්න  ඕනි කියන එක. ඒ හින්දා තමයි 77න් පස්සේ බලයට ආපු හැම පාලකයෙක්ම අධ්‍යාපනය විකුණන්න අවශ්‍ය පිඹුරුපත් සැකසුවේ. අධ්‍යාපනයට වෙන් කරන ප‍්‍රතිපාදන කප්පාදු කළේ.
ඒකේ ප‍්‍රතිඵලයක් විදියට මේ වෙන කොට පාසල් විශාල ප‍්‍රමාණයක් වැහිලා, අම්මලා තාත්තලට පාසල් අධ්‍යාපනයේ බර කරට ගන්න වෙලා. ළමයා ළදරු පාසලට දාන දවසෙ ඉදන් ගෙවන්න වෙලා. මුලින්ම පාසල් වල රුපියලෙන් දෙකෙන් මුදල් අය කරන්න පටන් ගත්ත එක, පාසලට ළමයා දානකොට ඩෙස් එක පුටුව දෙන්න පටන්ගත්ත එක තමයි දැන් රුපියල් දහස් ගනන් ලක්ෂ ගනන් පාසලට ගෙවන්න වෙලා තියෙන්නෙ. එහෙම ගෙව්වෙ නැත්නම් පාසලට ළමයා දාන්න බෑ. පාසල් වල මුදල් එකතු කරනකොට ගෙව්වේ නැත්නම් ළමයා පාසලෙන් කොන් කරනවා. පාසලේ තීන්ත ගාන්න මුදල් ගෙවන්න පොල් ගෙඩි 8ක් හොරකම් කරන්න පාසල් ශිෂ්‍යාවකට සිදු වෙන්නේ ඒ හින්දා. හැම දෙමාපියෙක්ගෙම බලාපොරොත්තුව තමයි ළමයින්ට හොදින් උගන්වන එක. ඒකට හොද පාසලකට ළමයා දාන්න  ඕනි. පාසල් වලට ළමයි දාන්න තරගයක් නිර්මාණය කරලා. ඒක නිසා තමයි ළමයි පාසලට දාන්න  සල්ලි ගෙවන්න වෙන්නේ, එහෙම නැත්නම් අම්මලට ලිංගික අල්ලස් දෙන්න වෙන්නේ, දුව පාසලට දාන්න පියාට එකම ආදායම් මාර්ගය වෙච්ච ඔරුව විකුනන්න වෙන්නේ.
පාසල් තුළ මුදල් අය කරන එක සමාජයේ දරුණු ප‍්‍රශ්නයක් වෙලා. මේක නතර කරන්න අපි පෙළ ගැසෙන්න  ඕනි. මොකද මේක අපේ ප‍්‍රශ්නයක්, අපේ අම්මාගේ තාත්තාගේ ප‍්‍රශ්නයක්. පාසල් තුළ මුදල් අය කිරිම නතර කිරීමට සටන් කරන්න  ඕනි. ඒ නිසා පාසල් තුළ මුදල් අය කිරීමට එරෙහිව, අධ්‍යාපනය පෞද්ගලීකරණයට එරෙහිව අපි පෙළගැසෙමු!

අන්තර් විශ්වවිද්‍යාලයීය ශිෂ්‍ය බලමණ්ඩලය


අනෙක් අයටත් බලන්න ශෙයා කරන්න >>>